ರಸ್ತೆ, ಸಾಗುತ್ತಲೇ ಇದೆ,
ಇಂದು ನಿನ್ನೆಯದಲ್ಲ
ಅಂದು ಕಾಲು ದಾರಿ
ಇಂದು ಕಪ್ಪುಡಾಂಬರು
ಮೆತ್ತಿ, ಅಲ್ಲಲ್ಲಿ ಹೊಳಪು!
ಚಾಚುತ್ತದೆ ಕೆಲವೊಮ್ಮೆ
ಒಣತುಟಿಯ ಸೀಳುನಗೆ
ಅಲ್ಲಲ್ಲಿ ತಿರುವು, ಕೊಂಕು!
ಕರೆಯುತ್ತದೆ ಕೈ ಬೀಸಿ
ದೂರದೂರದ ಹಸಿರು!
ಕೆಳಗಿಳಿಯುತ್ತೇವೆ,
ಮತ್ತಷ್ಟೂ ನುಣುಪು
ಅಲ್ಲೆರಡು ಉಬ್ಬು,
ಆಸೆಯ ವೇಗಕ್ಕೆ ತಡೆ,
ಉಬ್ಬುಗಳ ಸವರಿ
ಮತ್ತೆ ಪಯಣ
ಇಳಿದಷ್ಟೂ ಬೆವರಸುಖ!
ಹಿತಗಾಳಿ, ಉಸಿರಬಿಸಿ,
ರಸ್ತೆ ಮೈದೊಡವುತ್ತದೆ
ಅಲ್ಲಲಿ ಸುಖದ ಅಮಲು,
ಕುಲುಕಾಟ ಮೈಮೇಲೆ
ಗುಳಿಯೊಳಗೆ ಬಿದ್ದೆದ್ದು!
ಸಾಗುತ್ತಲೇ ಇದೆ
ಪಯಣ, ರಸ್ತೆ ಸುಸ್ತೋ!
ಪ್ರಪಾತದಲೊಂದು ಇಣುಕು
ಕಣ್ತಂಪಿಗೊಂದು ವೇಗ
ಗಮ್ಯ ಸೇರುವ ತವಕ!
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ